बुधवार, ९ सप्टेंबर, २०२०

एवढें लक्षांत ठेवा - विंदा करंदीकर

 

उंची न अपुली वाढते फारशी वाटून हेवा!

श्रेय ज्याचें त्यास द्यावे; एवढें लक्षांत ठेवा.


ती पूर्वजांची थोरवी त्या पूर्वजांना गौरवी;

ती न कामी आपुल्या; एवढें लक्षांत ठेवा.


जाणतें जें सांगती तें ऐकुनी घ्यावें सदा;

मात्र तींही माणसें! एवढें लक्षांत ठेवा.


चिंता जगीं या सर्वथा कोणा न येई टाळतां;

उद्योग चिंता घालवी; एवढें लक्षांत ठेवा.


दुप्पटीनें देतसे जो ज्ञान आपण घेतलेलें,

तो गुरुचे पांग फेडी; एवढें लक्षांत ठेवा.


माणसाला शोभणारें युद्ध एकच या जगीं;

त्यानें स्वत:ला जिंकणे! एवढें लक्षांत ठेवा.

कोणत्याही टिप्पण्‍या नाहीत: