सर्सर सर्सर वाजे… - आरती प्रभू

सर्सर सर्सर वाजे…
पत्ताच पत्ताच नाही;

वाऱ्याशी निरोप आला:
आत्ताच आत्ताच नाही

टप्पोर टप्पोर कळ्या
विलग झाल्यात काही;
नुस्ताच हलून वारा
सुगंध हलत नाही

झंझन झंझन झाले,
पाखरू उडत गेले;
उलट उलट झाड
तळ्यांत बुडत गेले

झर्झर झर्झर गेली
घाईत घाईत कोण?
गवतपातींत सर
उन्हांत पाडीत सोनं 

थर्थर थर्थर शुभ्र
झाडून उदास पंख,
तळ्याशी अनाम पक्षी
झालेला निव्वळशंख