सोमवार, २३ एप्रिल, २००७

माझ्या मना बन दगड - विंदा करंदीकर

माझ्या मना बन दगड

हा रस्ता अटळ आहे !
अन्नाशिवाय, कपड्याशिवाय
ज्ञानाशिवाय, मानाशिवाय
कुडकुडणारे हे जीव
पाहू नको, डोळे शिव!
नको पाहू जिणे भकास,
ऐन रात्री होतील भास
छातीमधे अडेल श्वास,
विसर यांना दाब कढ
माझ्या मना बन दगड!

हा रस्ता अटळ आहे !
ऐकू नको हा आक्रोश
तुझ्या गळ्याला पडेल शोष
कानांवरती हात धर
त्यांतूनही येतील स्वर
म्हणून म्हणतो ओत शिसे
संभाळ, संभाळ, लागेल पिसे!
रडणाऱ्या रडशील किती?
झुरणाऱ्या झुरशील किती?
पिचणाऱ्या पिचशील किती?
ऐकू नको असला टाहो
माझ्या मना दगड हो!

हा रस्ता अटळ आहे !
येथेच असतात निशाचर
जागोजाग रस्त्यावर
असतात नाचत काळोखात;
हसतात विचकून काळे दात
आणि म्हणतात, कर हिंमत
आत्मा विक उचल किंमत!
माणूस मिथ्या, सोने सत्य
स्मरा त्याला स्मरा नित्य!
भिशील ऐकून असले वेद
बन दगड नको खेद!

बन दगड आजपासून
काय अडेल तुझ्यावाचून
गालावरचे खारे पाणी
पिऊन काय जगेल कोणी?
काय तुझे हे निःश्वास
मरणाऱ्याला देतील श्वास?
आणिक दुःख छातीफोडे
देईल त्यांना सुख थोडे?
आहे तेवढे दुःखच फार
माझ्या मना कर विचार
कर विचार हास रगड
माझ्या मना बन दगड

हा रस्ता अटळ आहे !
अटळ आहे घाण सारी
अटळ आहे ही शिसारी
एक वेळ अशी येईल
घाणीचेच खत होईल
अन्यायाची सारी शिते
उठतील पुन्हा, होतील भुते
या सोन्याचे बनतील सूळ
सुळी जाईल सारे कूळ
ऐका टापा! ऐका आवाज!
लाल धूळ उडते आज
त्याच्यामागून येईल स्वार
या दगडावर लावील धार!
इतके यश तुला रगड
माझ्या मना बन दगड

१३ टिप्पण्या:

Ashish Khurange म्हणाले...

khup chhan kavita !!!
post kelyabaddal dhanyavaad.

Kavyasnrahaach naav kalalyas adhik anand hoil :)

marathi status, photo, thought म्हणाले...

Khup chhan kavita aahe
Thanks post kelyabaddal

Unknown म्हणाले...

Kavita koni lihili....

Unknown म्हणाले...

खूप दिवसापासून या कवितेच्या शोधात होतो.
वाचायला मिळाली. धन्यवाद👏

Shankar_Amale म्हणाले...

छान!!!

Unknown म्हणाले...

aamachya velachya aksraavichya marathi pustakat hi kavita hoti. saras aani prsbhavashali.

Unknown म्हणाले...

Sunder

Unknown म्हणाले...

Thank u, good job!

Unknown म्हणाले...

Nice poem

Satish Kulkarni म्हणाले...

अफलातून कविता.

Unknown म्हणाले...

कौतुकाचे शब्द कमी पडतील विंदा साठी .....

Unknown म्हणाले...

वर नांव आहे दिलेलं.

anahad म्हणाले...

आत्ता च्या काळात प्रशासकीय चुका ऐकून अशीच अवस्था होते.